தொடர் தோல்விகளால் அதிர்ச்சியில் மும்பை இந்தியன்ஸ்! "எங்கள் பிளான் வேலை செய்யவில்லை" - கேப்டன் ஹர்திக் பாண்டியா ஓப்பந்தம்!

மும்பை: ஐபிஎல் 2026 சீசனில் மும்பை இந்தியன்ஸ் அணி சந்தித்து வரும் தொடர் சரிவுகள் கிரிக்கெட் வட்டாரத்தில் பெரும் விவாதத்தை ஏற்படுத்தியுள்ளது. ஆர்சிபி (RCB) அணிக்கு எதிரான ஆட்டத்தில் தோல்வியைத் தழுவிய பின், மும்பை அணியின் கேப்டன் ஹர்திக் பாண்டியா தனது அதிருப்தியை வெளிப்படையாகப் பகிர்ந்து கொண்டார்.

நடப்பு ஐபிஎல் தொடரில் ஹாட்ரிக் தோல்விகளைச் சந்தித்துள்ள மும்பை இந்தியன்ஸ் அணி, தற்போது புள்ளிப் பட்டியலில் 8-வது இடத்திற்குத் தள்ளப்பட்டுள்ளது. இந்த நிலையை மாற்ற வேண்டிய கட்டாயத்தில் அணி உள்ளதாக ஹர்திக் தெரிவித்தார்.

ஆர்சிபி உடனான தோல்வி குறித்துப் பேசிய ஹர்திக், "கடந்த சில போட்டிகளில் நாங்கள் தொடர்ந்து பின்தங்கியே இருக்கிறோம். முக்கியமாக விக்கெட்டுகளைத் தாரை வார்ப்பதும், பந்துவீச்சில் அதிக ரன்களைக் கொடுப்பதும் எங்களை நிலைகுலையச் செய்துள்ளது. ஆட்டத்தில் ஆதிக்கம் செலுத்தத் தவறிவிட்டு, எதிரணியின் ரன்களை ஈடுசெய்யவே (Catch-up) போராடுகிறோம்" என்றார்.

"நேர்மையாகச் சொல்லப்போனால், தற்போதைய அணுகுமுறை செயல்படவில்லை. டாஸ் வெல்வது மட்டும் வெற்றியைத் தராது. பிட்ச்சின் தன்மையைப் பொறுத்து முதலில் பேட்டிங் செய்வதா அல்லது பந்துவீசுவதா என்பதை மறுபரிசீலனை செய்ய வேண்டும். குறிப்பாக பவர்பிளே (Powerplay) ஓவர்களில் நாங்கள் இன்னும் கூடுதல் கவனம் செலுத்த வேண்டும்," என அதிரடி மாற்றங்கள் குறித்து அவர் சுட்டிக்காட்டினார்.

அணியின் தற்போதைய இக்கட்டான சூழலில், ரூதர்போர்டின் (Rutherford) வருகை கூடுதல் பலத்தைத் தந்துள்ளதாக ஹர்திக் குறிப்பிட்டார். அவரது அதிரடி ஆட்டம் அணிக்குத் தேவையான உத்வேகத்தை அளிக்கும் என்றும், அடுத்த போட்டிக்கு முன்பாக கிடைக்கும் ஓய்வு நாட்களில் புதிய திட்டங்கள் வடிவமைக்கப்பட்டு அமல்படுத்தப்படும் என்றும் அவர் உறுதியளித்தார்.