சென்னை அணியை வீழ்த்தி பிளே-ஆப் சுற்றுக்குள் நுழைந்தது ஐதராபாத் – இஷான் கிஷன் அதிரடி
ஐபிஎல் 2025-ல் சேப்பாக்கத்தில் நடைபெற்ற ஆட்டத்தில், சென்னையை 5 விக்கெட்டுகள் வித்தியாசத்தில் வீழ்த்தி ஐதராபாத் அணி பிளே-ஆப் சுற்றுக்கு முன்னேறியது. இஷான் கிஷனின் 70 ரன்கள் அதிரடி ஆட்டமும், கம்மின்ஸின் 3 விக்கெட்டுகளும் முக்கியமானவை.
ஐ.பி.எல். 2025 கிரிக்கெட் தொடரின் 63-வது லீக் ஆட்டம் சென்னை சேப்பாக்கத்தில் உள்ள எம்.ஏ.சிதம்பரம் ஸ்டேடியத்தில் நடைபெற்றது. இதில் 5 முறை சாம்பியனான சென்னை சூப்பர் கிங்ஸ் அணியை, முன்னாள் சாம்பியனான சன்ரைசர்ஸ் ஐதராபாத் அணி 5 விக்கெட் வித்தியாசத்தில் வீழ்த்தி, பிளே-ஆப் சுற்றுக்கு முன்னேறியது.
இந்த ஆட்டத்தில் டாஸ் வென்ற சென்னை அணி முதலில் பேட்டிங் செய்யத் தேர்வு செய்தது. சென்னை அணியின் தொடக்க வீரர் சாம்சன் அதிரடியாக ஆடித் தொடங்கினார். 2 ஓவர்களில் அணியின் ஸ்கோர் 30 ரன்களை எட்டிய நிலையில், கம்மின்ஸ் வீசிய 3-வது ஓவரில் சாம்சன் ஆட்டமிழந்தார். அடுத்து வந்த உர்வில் படேல் அந்த ஓவரிலேயே இரண்டு சிக்சர்களைப் பறக்கவிட்டார், எனினும் 5-வது ஓவரில் அவரும் விக்கெட்டை இழந்தார். பவர்பிளே முடிவில் சென்னை 2 விக்கெட்டுகளை இழந்து 57 ரன்கள் எடுத்திருந்தது.
இதன்பிறகு, ருதுராஜும் கார்த்திக் சர்மாவும் சேர்ந்து அணியை மீட்டெடுத்தனர். கார்த்திக் சர்மா 32 ரன்கள் எடுத்த நிலையில் கம்மின்ஸ் பந்துவீச்சில் வெளியேறினார். கேப்டன் ருதுராஜ் 15 ரன்களில் அதே கம்மின்ஸுக்கு விக்கெட்டை இழந்தார். பின்னர் பிரேவிஸும் சிவம் துபேயும் இணைந்து நிதானமாக ரன்களைக் குவித்தனர். பிரேவிஸ் 44 ரன்களிலும், துபே 26 ரன்களிலும் ஆட்டமிழந்தனர். இறுதியில் 20 ஓவர்கள் முடிவில் சென்னை அணி 7 விக்கெட்டுகளை இழந்து 180 ரன்கள் மட்டுமே எடுத்தது. ஐதராபாத் தரப்பில் கம்மின்ஸ் மூன்று விக்கெட்டுகளைக் கைப்பற்றினார்.
181 ரன்கள் எடுத்தால் வெற்றி என்ற இலக்குடன் களமிறங்கிய ஐதராபாத் அணிக்கு, தொடக்க வீரர் டிராவிஸ் ஹெட் 6 ரன்களிலேயே கேட்ச் ஆகி வெளியேறினார். அடுத்து அபிஷேக் சர்மா 26 ரன்களில் ஆட்டமிழந்தார். ஆனால் இஷான் கிஷன் அதிரடியாக ஆடி அரைசதம் கடந்தார். ஹென்ரிச் கிளாசன் 47 ரன்களில் அவுட்டானார். தொடர்ந்து அதிரடியை நிறுத்தாத இஷான் கிஷன், சென்னை பந்துவீச்சைச் சிதறடித்து 70 ரன்களைக் குவித்தார். இதன் விளைவாக, ஐதராபாத் அணி 19 ஓவர்களிலேயே 5 விக்கெட்டுகளை இழந்து 181 ரன்களை எட்டியது. இதன்மூலம் 5 விக்கெட் வித்தியாசத்தில் ஐதராபாத் அணி வெற்றி பெற்றது.
இந்த வெற்றியின் மூலம் ஐதராபாத் அணி பிளே-ஆப் சுற்றுக்கு முன்னேறியுள்ளது. ஏற்கனவே பெங்களூரு அணி பிளே-ஆப்பில் நுழைந்த நிலையில், இன்றைய ஆட்டத்துடன் ஐதராபாத் மற்றும் குஜராத் அணிகளும் பிளே-ஆப் படலத்துக்கு முன்னேறியிருப்பது குறிப்பிடத்தக்கது.
